Itoobiya-(DigaaleNews)-Wararka ka imaanaya dalkaasi Itobiya ee ku aadan doorashooyinka halkaasi ka socda ayaa sheegaya in xisbiga ra`iisal wasaaraha iminka talada haya ee Meles Zanawi "Ethiopian People's Revolutionary Democratic Front (EPRDF)" ay ku horeeyaan codadka doorashiiyinka, gobol walba oo dalkaasi ka tirsan.
Warkan ayaa waxaa sheegay masuul ka tirsan gudiga doorashiiyinka, waxaana uu intaaso raaciyay in doorashadu u dhacday qaab daggan oo nabad ah inkastoo buu yiri ay jiraan eedeymo isdaba-marin codad ah oo lasoo sheegayo islamarkaana ay baarayaan gudiga doorashooyinka.
Hey`adda ilaalisa xuquuqda Aadanaha Human Rights Watch ayaa iyadu eedeysay doorashooyinka ka soconaya Itobiya, waxaana ay ku eedeysay in ay tahay mid ay awood weyni ku leedahay xukuumadda iminka talada dalka haysa ee uu hogaamiyo ra`iisal wasaare Meles Zanaawi.
Human Rights Watch ayaa sheegtay in dowladdu waday bilooyin ka hor inta aysan doorashooyinku bilaaban olole ay ku "cadaadineysa uguna hanjabeyso" dadka Itobiyanka ah ee iyagu wax dooranaya.
Doorashadii ugu dambeysay ee Itobiya ka dhacdo ayaa waxaa la qabtay sanadkii 2005-tii, waxaana rabshado ka dhashay doorashadaasi ay galaafteen nolosha dad badan oo Itoobiyaan ah iyadoona ay ku dhaawacmeen boqolaal dad ah.
Natiijada dhabta ah wali laguma dhawaaqin, waxaana socda wali tirinta cododka iyadoona ay dalkaasi goobjoog yihiin gudi ka socda Midowga Afrika iyo Midowga Yurub kuwaasoo ilaalinaya qaabka ay u dhaceyso doorashada.
Mr. Meles ayaa xukunka dalkaasi qabsaday sanadkii 1991-dii, kadib markii ay jabhadiisu afgambi ku sameeyeen xukuumadii xilligaasi ee Mingistu, iyagoo ka helayay taageero maleteri, dhaqaale iyo mid xarunba xukuumadii Soomaaliya ee uu hogaaminayay marxuum Maxamed Siyaad Barre.
Aucun commentaire:
Enregistrer un commentaire